PPSC gi-pull-out na sa CPDRC
CEBU, Philippines - Gipull-out na kagahapon ang mga sakop sa Provincial Public Safety Company kon PPSC sa Cebu Provincial Detention and Rehabilitation Center (CPDRC).
Matud ni Dr. Gil Macato ang acting warden sa CPDRC nga gipapull-out na sa gobernador ang PPSC sa provincial jail kay nagtuo kini nga kaya na sa kadagkuan sa provincial jail nga ipadayon ang pagbantay sa mga priso.
“Actually gipull-out na sila kay siguro tan-aw ni Governor nga ang bag-ong administration can handle the facility well kay murag kumbaga, kato sila (PPSC) temporary ra lagi tong ilaha stay” matud ni Macato.
Ang PPSC nga adunay 20 ka sakop nitabang sa pagbantay sa CPDRC sukad niadtong Agosto human sa kontrobersiya sa maong provincial jail.
Si Macato nagkanayon nga bisan og wala na ang mga polis, magpabilin gihapong istriko ang mga personnel sa prisohan sa pag-implementar sa bag-ong polisiya partikular na sa pagpasulod og dalaw ug mga butang nga alang sa mga priso sama sa pagkaon aron pagsiguro nga walay kontrabando nga makasulod.
Dugang ni Macato nga iya nang gimandoan ang mga gwardya ug mga personnel nga kinahanglan wala nay kontrobersiya o panghitabo sa sulod sa CPDRC.
“Sa karon I can assure you nga gipangusgan gyud na namo nga wala gyud mga kontrabando even kanang mga kwarta karon, gidili na na karon gidili na namo pagsulod, mga lutoanan nga electric kuan, daghan na mi na confiscate ana” dugang ni Macato.
Ang provincial jail adunay 60 ka prison guards apil na ang 9 ka bag-ong gipasulod matud pa ni Macato. (BANAT NEWS)
- Latest
