CEBU, Philippines - Gipahibawo ni Provincial Election Supervisor, Atty. Lionel Marco Castillano, nga bukas ang mga buhatan sa Commission on Elections ugmang adlawa bisan og holiday.
Si Castillano niawhag sa tanang kawani sa pribado ug gobiyerno ingon man mga tinun-an nga magparehistro tungod kay pabor na nila kini.
Kadtong mga wala pay mga biometrics, magpa-reactivate ug magpa-transfer giawhag usab kining mobisita sa buhatan sa Comelec.
Hinuon ang mga buhatan sa Comelec bukas kini gikan sa alas 8:00 sa buntag hangtud sa alas 5:00 sa hapon gikan sa Lunes hangtud sa Sabado lakip na sa mga holidays gawas lang sa Disyembre 24 ug 25 nga kasaulugan sa Pasko ug Abril 13 ug 14 nga mga Mahal nga Adlaw.
Si Castillano nanghinaut nga unta ang mga botante magparehistro kini samtang sayo pa dili kay adto na sa katapusang adlaw nga moresulta na sa kalangan tungod kay maghuot na ang mga buhatan sa Comelec.
Ang pagpangrehistro alang sa eleksiyon sa Sangguniang Kabataan ug Barangay sunod tuig gisugdan niadtong Nobiyembre 7 ug matapos kini unya sa Abril 29, 2017. Ang Comelec mopahigayon usab og off-site registration o anha sa kabarangayan ilabi na sa mga bukirang lugar aron ang mga botante maaghat gyud sa pagparehistro.
Subay niini, gipahibawo ni Castillano nga ang tanang buhatan sa Comelec duna nay Facebook page isip kabahin sa kampaniya sa pag-edukar sa mga botante.
Matud ni Castillano nga kadtong dunay mga pangutana pwedeng mo-post sa Facebook aron matubag dayon sila.
Ang kadtong mga wala pay voters ID pwede usab kining anha lang mosusi sa Facebook tungod kay dunay mga gi-post nga listahan sa mga pangalan kinsa ang mga ID naabot na apan wala pa ma-claim sa tag-iya.
Giingong ubay-ubay ang nadawat nga reklamo sa Comelec gikan sa mga botante kinsa wala pa kakuha sa ilang ID.
Apan giingong ubay-ubay na usab ang nangabot nga ID ug wala pa kuhaa sa mga tag-iya.
Dugang ni Castillano nga ang Comelec dili maoy mohatud sa tagsa-tagsa sa kabalayan sa mga botante ug ang mga botante maoy moadto sa buhatan sa Comelec aron mokuha sa ilang ID.
Atol sa off-site registration, ang mga election officers magdala kini sa mga niabot na nga ID sa mga botante sa barangay nga ilang bisitahon. (BANAT NEWS)