CEBU, Philippines - Dul-an na sa usa ka buwan human gipatuman ang bag-ong schedule sa pagkolekta og basura sa Dakbayan sa Sugbo apan duna lang gihapoy mga barangay ang wala motuman sigun pa sa assistant head sa Department of Public Services nga si John Paul Gelasque.
Aron mapasabot gyud og maayo ang mga barangay mahitungod niini, mopadala og suwat hangyo ang DPS kang Association of Barangay Councils (ABC) president ug Tisa Barangay Kapitan Philip Zafra.
Matud ni Gelasque nga naa lang gihapoy ubang barangay nga wala mosunod sa bag-ong schedule kay matud pa dunay ubang mga barangay nga mangolekta og buntag ug moderetso sa Inayawan bisan og dili sila tugutan nga molabay didto.
Usa sa reklamo sa Barangay Luz mahitungod sa bag-ong schedule mao ang problema sa trapik sigun ni Gelasque kay main road man kini apan makigkita sila sa mga opisyal aron mahatagan og sulbad ang maong problema.
Lakip sa sentimento sa mga kapitan nga ang landfill ngitngit ug walay suga apan giklaro ni Gelasque nga gikan sa agianan ug sa sulod sa landfill ila na kining nabutangan og suga.
“Sa DPS alone mohatag mi og formal letter request address kang Sir Philip Zafra as ABC president para siya na ang mo-relay sa mga barangays,” matud ni Gelasque.
Nasayran nga dunay unom ka compactor trucks nga magdagan sa siyudad nga maoy mokuha niadtong mga basura nga mahabilin sanglit dili buot sa DPS nga hugaw tan-awon ang kadalanan. (BANAT NEWS)