CEBU, Philippines - Tinguha karon sa Philippine Statistics Authority (PSA) nga himoon na lang sa duha ka oras ang pagkuha sa birth, death ug marriage certificate subay sa kagustohan ni Presidente Rodrigo Duterte.
Matud ni PSA-7 Director Ronald Taghap nga nagkadugay ang panahon, nagkapaspas usab ang transaksiyon sa ilang buhatan diin molanat na lang og tulo ngadto sa lima ka adlaw nga makuha na ang gipangayo nga dokumento.
Maoy ilang gitinguha karon nga maabot ang ilang laraw nga moabot na lang unya og duha ka oras ang pagkuha sa mga dokumento apan ila pa gisusi ug gitubag ang mga panginahanglanon aron maabot ang maong plano.
Sumala pa ni Taghap nga mahimo ra nga makuha sa samang adlaw ang mga gipangayo nga mga dokumento kung walay mga problema nga masugatan tungod kay usa sa makalangay ang pag-download sa mga dokumento gikan sa ilang ulohang buhatan ug usahay maghinay usab ilang internet connection
Gitug-an ni Taghap nga aduna silay 58 ka mga local government units ang nahimo nilang partner alang sa paspas nga proseso sa PSA sa pagkuha og dokumento nga gitawag nila og satellite. (BANAT NEWS)