CEBU, Philippines - Masugdan na unya ang plano ni Cebu City Mayor Tomas Osmeña nga magbutang og mga fire extinguishers sa mga kapilya sa dakbayan nunot sa sugyot sa Bureau of Fire Protection-7.
Matud ni Dr. Annyl Capatoy, officer-in-charge sa BFP-7, nga ang maong mga fire extinguishers mahimong magamit dayon sa pagpawong sa kayo aron dili kini makadaku.
Isip planning officer sa BFP-7, nakig-alayon sila sa Cebu City Disaster Risk Reduction and Management Office aron mahatagan og ngalan ang maong programa nga ilang gitawag nga 3K (Kapilya Kontra Kalayo).
Gihulagway ni Capatoy nga kadtong mga fire extinguishers nga nahatag sa mga barangay kaniadto wala kaayo naatiman ug napasagdan lang hinungdan nga nanghinaut sila pinaagi sa programa nga makorehian ang mga sayop nga nahimo kaniadto.
Aron dili mapasagdan ang maong mga ekipo, sigun ni Capatoy nga usa sa ilang buhaton mao ang pagbutang og logo sa siyudad sa mga fire extinguishers, control number aron mailhan kung asa nga kapilya ibutang ang ekipo ug kung mogamit kinahanglan nga dunay incident report.
Dugang sa opisyal nga sakop sila sa Mayor’s Management Team (MMT) ug tungod kay gusto nila nga makatampo sa ilang mga nakat-onan ila kining gihimo.
Nasayran nga moabot sa 813 ka kapilya sa tibuok siyudad sa Sugbo diin moabot sa 1,627 ka fire extinguishers ang giplanong ipanghatag nga mobalor og P5.5 milyones nga kuhaon sa disaster funds.
Sigun pa ni Nagiel Bañacia, pangulo sa CCDRRMO, nga ang proposal sa kabomberuhan mao nga mohatag og duha ka fire extinguishers matag kapilya apan kinahanglan nga dunay pagbansay-bansay nga himoon.
Gihulagway ni Bañacia nga tumong sa maong programa nga magsilbi kini nga ‘first line of defense’ batok sa sunog. (BANAT NEWS)