CEBU, Philippines - Gisugyot ni Cebu City Mayor Tomas Osmeña nga buhok ni Busay Kapitan Amilo Lopez ang ipaubos sa drug test.
Ilakip niini ang ubang opisyal sa barangay kinsa wala na drug test sa niaging semana.
Matud ni Osmeña nga andam siya mogasto sa kaugalingong kwarta alang sa maong tumong gumikan kay nasuta nga molanat pa sa tulo ka tuig una pa mawala ang kemikal nga gigamit pinaagi sa buhok.
Ang sugyot nitumaw human gikwestiyon ang pagpositibo ni Lopez sa drug test ug gituohan nga dunay politika ug hayan giilisan ang sample sa ihi. Apan ang pangulo sa City Office for Substance Abuse Prevention (COSAP), Dr. Alice Utlang, nihimakak sa pasangil.
Gani matud ni Utlang nga wala gyud niya gipahibawo si Osmeña kung kinsa nga kapitan ang nagpositibo ug ipaubos pa sa confirmatory test ang unang resulta.
Nahibulong na lang si Utlang nga nigawas ang pangan ni Lopez.
Giawhag ni Utlang si Lopez sa pag-adto sa laboratory ug pagdeklarar sa mga tambal nga iya gigamit. (BANAT NEWS)