CEBU, Philippines - Gihusay ni Talisay City Mayor Eduardo Gullas ang kalibog sa mga sakop sa buhatan sa City of Talisay-Traffic Operation Development Authority (CT-TODA) kung kinsa ang ilang labaw.
Giklaro ni Gullas nga si retired general Hiram Benatiro gyud ang labaw sa maong buhatan ug dili si Almond Keith dela Peña.
Kini sukwani sa pamahayag ni Bise Mayor Alan Bucao nga si dela Peña ang pangulo sa CT-TODA ug si Benatiro usa ka consultant.
Apan si Gullas ang nihatag og husay dihang gipatawag si Benatiro ug dela Peña kagahapon sa buntag.
Matud ni Gullas nga iyang gisalig ang responsibilidad sa CT-TODA kang Benatiro samtang si dela Peña ang deputy.
Si Benatiro sa iyang bahin mapasalamaton kang Gullas nga maoy nisulbad sa ilang problema.
Ang posisyon sa duha gikompirmar sab ni Emily Cabrera, pangulo sa Human Resource Development Office. (BANAT NEWS)