CEBU, Philippines - Ipa-review sa negosyante nga si Crisologo Saavedra ang P51.4 milyones nga consultancy contract sa Kapitolyo alang sa pagtukod sa 12-andana nga edipisyo sulod sa Capitol compound tungod kay depektoso.
Pormal nga ipadangat ni Saavedra ang iyang suwat ugma sa buhatan ni Bokal Jerome Librando, chairman sa committee on infrastructure sa Provincial Board, nga maghangyo sa pagpadeklarar sa bidding nga pakyas.
Buot ni Saavedra nga ma-recall ang rekomendasyon sa Bids and Awards Committee sa pag-award sa kontrata sa A.S. Enriquez Engineering Consultancy.
Matud ni Saavedra nga dili kwalipikado ang kontraktor sanglit wala kini ISO 9001:2008 certification.
Mismo si Engr. Jose Gonzalo S. Tumulak, sa Technical Working Group – consultancy BAC, sa iyang report niingon nga ang Apollo S. Enriquez Engineering Consultancy kuwangan og Sr. Electro-Mechanical Engineer and Quantity Surveyor.
Sayo niini si Gob. Hilario Davide III nidepensa sa BAC human gikwestiyon ni Kongresista Benhur Salimbangon ang kontrata tali sa maong kontraktor.
Hinuon ang suwat nga giingong gikan ni Salimbangon walay pirma. Matud sa suwat nga kwestiyonable ang track record sa maong consultancy firm base sa niaging mga proyekto sa kagamhanan sa probinsiya. (BANAT NEWS)