Populasyon sa Cebu hapit na 3M

CEBU, Philippines - Ang Central Visayas maoy ikaupat sa nasud nga adunay labing daghang ihap sa tawo base sa census sa Philippines Statistic Authority sa buwan sa Agosto 2015. Sa maong datos nag-una  ang lalawigan sa Sugbo nga adunay dako og populasyon nga miabot og 2,938, 982 mas taas kung itandi sa 2010 census nga aduna lamay 2, 619, 362 nga populasyon.

Way labot niini ang mga highly-urbanized cities nga naglangkob sa Dakbayan sa Sugbo, Lapu-Lapu ug Mandaue City. Nagsunod ang Bohol sa adunay taas nga ihap sa populasyon nga niabot og 1, 313, 560 kung itandi sa 2010 nga aduna lamang 1, 255, 128 ka mga tawo.

Gisundan sa Dakbayan sa Sugbo ang Bohol nga adunay populasyon nga 922, 611 itandi sa 2010 nga adunay 866, 171. Anaa usab sa ikaupat ang Dakbayan sa Lapu-Lapu diin adunay 408, 112 populasyon gikan sa 350, 467 niadtong tuig 2010.

Base usab sa talaan ang Lapu-Lapu mao ang labing paspas ang pagdako sa populasyon dinhi sa Central Visayas nga niabot og 2.94 porsiyento.

Ang Dakbayan sa Talisay aduna kini 227, 645 nga populasyon ug gisundan sa Dakbayan sa Toledo nga adunay 170, 335, ug Dakbayan sa Danao, 136, 471.

Samtang sa mga kabarangayan, nag-una ang Brgy. Guadalupe sa kinadaghanan og mga nagpuyo, gisundan kini sa Basak sa Lapu-Lapu City, Lahug sa Dakbayan sa Sugbo, Tisa, Basak San Nicolas, Labangon, Mactan, Mambaling, Talamban ug Barangay Gun-ob sa Dakbayan sa Lapu-Lapu. (BANAT NEWS)