Mas istriktong balaud gipatuman sa CPDRC

CEBU, Philippines - Gitahan sa mga piniriso sa Cebu Provincial Detention and Rehabilitation Center (CPDRC) ang upat ka cellphones kagahapon nga gikan sa mga babayeng inmates nga anaa sa cell no. 66 ug 67 ngadto sa mga tigbantay sa maong pasilidad.

Matud ni PSIns. Zosimo Jabas ang team leader sa Provincial Public Safety Company nga maoy nitabang karon sa pagbantay sa  CPDRC nga nakadawat sila’g impormasyon gikan sa sulod nga aduna gihapoy mga touch screen nga cellphones sa sulod sa prisohan. Hinungdan nga ila kining gipa-surrender apan kagahapon dili mga touch screen phones ang gitahan. Si Bobby Legaspi ang acting assistant jail warden sa CPDRC nipahimangno nga kun dili ma-surrender ang touch screen phones karong semanaha posibleng masuspenso ang prebilihiyo sa mga priso lakip na ang dalaw sa mga anaa sa cell no. 66 ug 67.

Nagkanayon silang Jabas ug Legaspi nga 100% silang sigurado nga wala nay kontrabando nga nakasulod sa provincial jail tungod sa hugot nga inspeksyon nga ilang gipatuman.

Sila nagtuo nga ang mga cellphone nga gi-surrender, mga karaan na nga nagpabilin sa sulod. Matud ni Jabas nga usa sa ilang nakit-an nga lapses kaniadto mao ang pagdala sulod sa pasilidad sa mga priso sa ilang mga packages nga gitunol sa ilang pamilya sa panahon nga motambong sila og hearing. Hinungdan nga gidili na nila diin adunay memorandum nga nagmando sa mga guwardiya nga mo-escort sa mga priso atol sa hearing nga dili padad-on og package gikan sa gawas ang mga priso.

Aduna na say rotation sa mga guwardiya sa prisohan ug color coding sa mga IDs sa maong prisohan. (BANAT NEWS)