CEBU, Philippines - Gimanduan ni Talisay City Mayor Eduardo Gullas ang City Legal Officer sa pagsusi sa kontrata nga gisudlan ni kanhi mayor Johnny de los Reyes tali sa kontraktor sa modernong traffic lights. Kini human iyang nasayran nga gikwestiyon kini sa Commission on Audit (COA).
Ang maong proyekto nagkantidad og P14 milyones nga gibutang sa nagkadaiyang eskina sa South Road Properties (SRP) nga sakop sa dakbayan. Matud ni Gullas nga wala pa gyud nahingpit nahuman ang pagtaud sa mga traffic lights tungod kay kuwang pa man ang gibayad sa siyudad.
Buot niyang masayran kung wala ba naalkansi ang siyudad sa maong kontrata ug kun nganong aduna pay bayranan ngadto sa kontraktor. Alang niya maayo nga ipadayon ang modernong traffic lights apan dili siya gusto nga makompromiso tungod lang sa karaang kontrata nga gisudlan sa siyudad nga wala siya mahibawo.
Report nga iyang nadawat mao nga ang kontraktor dili kwalipikado nga mosalmot sa bidding.
Iyang gitahasan si Atty. Giovanni Sususco sa pagsusi sa maong kontrata ug kinahanglan nga manubag ang mga tawo nga responsable niini.
Gihangop ni Konsehal Val Ylanan ang plano ni Gullas. Si Ylanan ang nangamahan sa ordinansa alang sa paggahin og pundo sa pagpalit sa modernong traffic lights tungod kay siya man ang pangulo sa City of Talisay-Traffic Operation Development Authority (CT-TODA).
Siya nagkanayon nga wala sab siya natagbaw sa trabaho sa kontraktor ug matud pa niya nga wala na siya masayud kun kwalipikado ba ang kontraktor nga nitrabaho sa proyekto. (BANAT NEWS)