Pagsupak nga ilubong si Marcos sa Libingan ng mga Bayani nagpadayon

CEBU, Philippines - Nipadayag sa iyang pagsupak sa plano ni Presidente Rodrigo Duterte sa pagpalubong kang anhing Presidente Ferdinand Marcos sa Libingan ng mga Bayani si Cebu City Mayor Tomas Osmeña.

Matud ni Mayor Osmeña nga makapasagmuyo ang maong desisyon kay daghan nga mga Pilipino ang misakripisyo sa ilang kaugalingon alang sa atong nasud batok kang Marcos nga usa ka diktador unya ilubong kini ipon sa mga tinuod nga mga bayani.

Dugang niini nga bisan og adunay uban nga wala malubong sa maong sam-ang, sayod siya nga daghang nagsakripisyo alang sa Pilipinas ilabi na sa Sugbo.

 Wala gitago sa mayor ang iyang kasagmuyo kun nganong ilubong gyud si Marcos sa Libingan ng mga Bayani dungan sa pagbutyag nga dili kini angay ikapanghambog.

Gawas kang Osmeña daghan gyud ang mibabag sa plano ni Presidente Duterte kay dili usa ka bayani si Marcos tungod sa mga gihimo niini panahon sa iyang pamunuan diin giingong daghang kinabuhi ang nakalas ilabi na dihang gipatuman niini ang Martial Law.

Gani, daghang grupo ang mipahigayon og lihok protesta aron ipadayag ang ilang sentimyento aron dili madayon ang pagpalubong kang Marcos sa Libingan ng mga Bayani. Giduyugan sila sa panahon human mipagawas og 20-days Status Quo ante order ang Korte Suprema.

Sama kagahapon sa hapon diin mikabat sa 100 ka mga Sugbuanon ang naghiusa sa pagpahigayon og protesta atubangan sa Kapitolyo aron sab supakon ang paglubong ni Marcos sa maong lubnganan.

Ang mga nagprotesta gilangkuban sa mga activists personality panahon pa niadtong Martial Law diin usa niini mao si Retired Executive Judge Meinrado Paredes ug mga estudyante sa high school ug college gikan sa nagkalain-laing eskwelahan sa dakbayan sa Sugbo.

Si Emalyn Alviano sa Kilusan Cebu nagkanayon nga ang maong kalihukan mao ang una sa mga mosunod pa nila unyang mga kalihukan batok sa desisyon ni Presidente Duterte.

Ang maong rally gilangkuban og concert, Martial Law photo exhibits, mugshots photo booths ug sign-up petition sa panawagan kang Duterte sa pag-reconsider sa desisyon niini.

Si Atty. Democrito Barcenas, kinsa naila nga anti-Marcos leader sa Sugbo misaway kang Marcos nga mga peke ang credentials niini ug dili haom nga ilubong sa Libingan ng mga Bayani.  (BANAT NEWS)