CEBU, Philippines - Patay ang usa ka giingong drug pusher human kini giunay pagpusil sa lain usab nga gidudahang nalambigit sa ilegal nga drugas tungod sa pagduda nga impormante ang biktima sa kapolisan.
Ang pagpamusil nahitabo diha sa Sitio Lawis, Riverside, Brgy. Pasil ning Dakbayan sa Sugbo pasado alas-11 sa kagabhion. Ang gipatay mao si Rogelio Cabasa, 30, samtang ang nagpusil kaniya mao si Ronald Udto, 19, taga Brgy. Pasil.
Sumala pa sa imbestigasyon sa kapolisan, ang biktima iladong pusher sa lugar ug matud pa dinagko ang iyang mga mabaligya nga shabu ug nagnegosyo usab kini og video karera sa lugar.
Samtang ang suspetsado giingong dili tiggamitan og ilegal nga drugas ug dili usab mamaligya og drugas apan runner kini sa ilegal nga drugas sa lain usab nga drug pusher sa lugar.
Niangkon ang suspek sa iyang gibuhat ug matud niya iya to gibuhat kay nasuko siya sa biktima kay mao kini ang nisumbong sa kapulisan sa kung kinsa ang mga tawo nga namaligya og ginadiling drugas sa lugar.
Si Police Chief Insp. Keith Allen Andaya, hepe sa Station 6 nga nahinabi sa Banat News mibutyag nga ilang nadakpan si Cabasa sa iyang video karerahan pipila ka adlaw na ang nakalabay ug nakapiyansa kini maong nakagawas niadtong Agosto 23.
Matud pa ni Andaya samtang diha pa sa ilang kostudiya si Cabasa mibutyag kini sa mga pangalan sa mga drug pushers diha sa ilang lugar kay ganahan kini nga iyang masolo og pamaligya ang drugas sa Brgy. Pasil.
Gamit ang maong impormasyon, giingong daghan sa mga gipangalanan ni Cabasa ang nadakpan sa kapolisan, apan sa kadugayan si Cabasa maoy gidudahan sa mga taga didto tungod kay sukad nga nadakpan kini daghan nagsagunson ang operasyon sa kapolisan ug nangasikop gyud ang mga target.
Nibutyag ang suspek nga siya ang una nagpabuto kay armado man sad ang biktima apan gihimakak kini ni Andaya kay matud niya wala silay nakitang armas gikan sa patay’ng lawas sa biktima.
Si Udto midugang nga nasuko siya ni Cabasa kay nagbahad-bahad kini nila nga pamusilon sila niini ug dugay na usab nga adunay panagbikil iyang maguwang sa biktima mao nga iyang gipalit ang away.
Si Chief Supt. Noli Taliño, director sa Police Regional Office-7 dihang gikuhaan og pamahayag nagkanayon nga ang mga ingon niini nga kaso ug motibo maoy iyang gidudahang responsable niining daghan karong kaso sa pagpatay nga gitawag og extra-judicial killings nga hangtud karon gikonsiderar pa nilang “death under investigation.”
“Nangyayari dito sa atin ‘yan, ‘yung binaril na drug pusher or drug personality, ang suspect drug personality din,” matud pa sa heneral.
Samtang si Cebu City Police Office director Sr. Supt. Joel Doria mimando sa subsob nga pagpangita sa.38 kalibre nga armas nga giingong maoy gigamit ni Udto sa maong krimen kay gusto nilang tan-awon kun wala ba kini gamita sa uban pang mga krimen dinhi sa dakbayan. (BANAT NEWS)