CEBU, Philippines - Gumikan sa lalis sa parking, patay ang usa ka customer kinsa napusilan gamit ang shotgun sa guard on duty sa BDO sa may Barangay Subangdaku, dakbayan sa Mandaue pasado alas 12 sa udto kagahapon.
Sa gihimong pakisusi sa kapolisan sa Mandaue City Police Office Station 2 nga nahimutang sa Subangdaku, gibutyag ni SPO1 Allen Corado nga ang biktima mao si Edwin Danoso Tancio Sr. taga Barangay Tingub samtang ang suspetsadong guwardiya mao si Jomar Layco taga Subangdaku.
Nasayran nga nagmaneho sa iyang motorsiklo ang biktima ug mipadulong sa luyong bahin sa nahisgutang bangko aron mo-parking. Gibadlong kini sa gwardiya ug giawhag nga adto lang ipahiluna ang motorsiklo sa atubangan sa bangko.
Apan wala mopatuo ang biktima nga maoy hinungdan sa mainiton nilang panaglalis. Wala na makapugong sa iyang kapungot ang guwardiya hinungdan nga iyang napusilan ang biktima gamit ang iyang shotgun.
Gidala ang biktima sa UCMed nga nahimutang sa north reclamation area apan gideklarar kini sa mga doktor nga dead on arrival.
Ang guwardiyang suspek kinsa mitahan sa kapolisan human sa hitabo, gitanggong na sa detention cell samtang nagpaabot nga kasuhan. (BANAT NEWS)