CEBU, Philippines - Kapin sa P60,000 ang kantidad sa ginadiling drugas ang nasakmit sa kapolisan samtang nadakpan ang lima ka tawo sa Sitio Rattan, Talisay City pasado alas 4 sa hapon sa niaging adlaw.
Ang kapolisan nilusad sa Oplan Tukhang sa maong lugar nunot sa taho nga adunay ilegal nga kalihukan.
Giila ang lima nga nadakpan nga sila si Marjorie Breguis Mangubat, 35, molupyo sa Holy Child, Tabunok, kinsa nakuhaan og tulo ka gagmay nga pakete nga gituohang shabu.
Uban ni Mangubat ang kapuyo nga si Christopher Zabate Entienza, 40, nga nagpuyo sad sa maong lugar.
Laing nadakpan si Julius Cellen Bonghanoy, 29, taga Pakigne, Minglanilla; Roel Cabrera Repunte, 37, taga Sitio Rattan, Tanke, Talisay City, kinsa nakuhaan og usa ka medium-size ug lima ka pakete sa shabu.
Si Jay Posadas Oaminal, 40, taga Sariville Subdivision, Poblacion , Talisay City ang nakuhaan og tulo ka gagmay nga pakete nga shabu.
Matud pa ni Police Officer 1 Othello Largo, assistant investigator sa Talisay City Police Station, nga naila ang lugar nga drug den apan mingaw na kini karon tungod sa pagpatuman sa curfew. Samantha Mari A. Polo, USJ-R Intern ug Marisol E. Gecain (BANAT NEWS)