CEBU, Philippines - Hingpit na gyud nga gipangguba sa mga sakop sa demolition team sa kagamhanan sa Dakbayan sa Mandaue ang 100 ka balay sa Sitio Sapa-Sapa, Subangdaku.
Si Alberto Lapesigue, pangulo sa demolition team, niingon nga dugay na nga gipahibawo ang mga molupyo sa pagpaguba sa ilang mga panimalay sanglit nahimutang man kini sa taliwala sa sapa.
Dugang niya nga ang ilang gipangguba mao kadtong wala mohimo niini apan gitataw niya nga ang kadaghanan hinuon boluntaryo gyud ang mga tag-iya sa pagguba niini.
Si Lapesigue niingon nga nakadawat og P10,000 ang mga tag-iya sa panimalay nga gidemolis isip pinansiyal nga hinabang sa kagamhanan ug wala makadawat kadtong mga nanag-iya nga nakabaton usab og luna sa 6.5 hectares nga relocation site sa Barangay Paknaan.
Hinuon si Lapesigue niingon nga ilang tabangan sa paghakot sa mga ginuba ug ilang mga butang pinaagi sa pagkarga sa dump truck ug ilang ihatod ngadto sa dapit nga balhinan sa mga molupyo.
Si Gleciano Berdon, 65-anyos nga nagpuyo sa maong dapit sulod na sa 40 ka tuig, nipadayag nga daku na gyud hinuon og kausaban ang gilawmon sa tubig sa maong dapit panahon nga kusog ang uwan.
“Kaniadto dinhing dapita taga kiting lang sa tiil ang tubig bisan unsa ka kusog sa uwan. Karon kay kuyaw na kaayo kay lapaw na sa tawo ang tubig,” matud ni Lapesigue.
Gidasonan usab ni Rose Cagonon ang pamahayag ni Lapesigue ug kini ang hinungdan nga sagad sa ilang mga balay gihimo nga duha ka andana kay panahon nga magbaha adto man sila magpundo sa taas.
Si Ronie Brizo nga nagpuyo sa maong dapit sulod na sa 20 ka tuig nipadayag nga bisan lawom ang tubig panahon nga kusog ang uwan apan dili hinuon kusog ang sulod hinungdan nga dili sila bation og kabalaka kay mag-anam-anam kini sa paghubas ang tubig. (BANAT NEWS)