Dumpit mi-report na
Jojo C. Ugdol (Banat) - May 31, 2016 - 12:00am

CEBU, Philippines -  Nagsugod na sa pagproseso sa iyang mga papeles ang kontrobersyal nga polis nga si Senior Police Officer 1 Adonis Dumpit aron kini makabalik sa serbisyo.

Si Dumpit kapin unom ka tuig nga napriso human nakombikto sa kasong homicide tungod sa kamatayon sa 17 anyos nga si Ronron Go nga gipasanginlang notadong tulisan sa Brgy. Tejero ning Dakbayan sa Sugbo.

Hinuon si Dumpit,53, mouli una sa iyang yutang natawhan sa Davao Oriental aron makigkita sa iyang inahan.

Si Dumpit mibisita kagahapon sa buhatan sa Police Regional Office-7 ug nakigkita ni Chief Supt. Patrocinio Comendador Jr.

Gitambagan usab ni Comendador si Dumpit nga sa dili pa mohimo sa pag-duty kung kini makabalik na sa serbisyo kinahanglan nga mobasa una kini sa mga bag-ong direktiba sa Philippine National Police aron kini mahibalo sa mga bag-ong kamandoan.

Si Dumpit nga nahinabi sa mga tigbalita miangkon nga dako kaayo ang iyang kakulba nga basin og dili na siya dawaton pagkapolis. Gani nahunahunaan na lang niyang mangaplay na lang sa City Hall (Cebu).

Dugang pa ni Dumpit nga sa dihang anaa kini sulod sa prisohan didto kini nakat-on sa pag-ampo ug sa pag Rosario.

Si Dumpit nabilanggo sa Criminal Investigation and Detection Group (CIDG)-7 sulod sa usa ka tuig, upat ka tuig sa Cebu City Jail ug usa ka tuig usab sa Abuyog Penetentiary sa Leyte.

Gitambagan usab ni Dumpit ang mga kriminal ug mga badlungon nga magbag-o na lang sa ilang kinabuhi ilabina karon nga si Rodrigo Duterte na ang presidente.

“Tungod sa presidente (President-elect Rodrigo Duterte) karun amping na lang… laban na lang parehas ug pagbag-o,” sigun pa ni Dumpit. (BANAT NEWS)

 

GLOBAL COMMUNITY
Philstar
  • Latest
Latest