CEBU, Philippines - Human sa problema sa huwaw, ang mga mag-uuma mag-atubang na usab og problema sa peste nga mokaon sa ilang mga tanom matud sa Provincial Agriculturist nga si Dr. Roldan Saragena.
Matud ni Saragena nga niadtong buwan sa Mayo hangtud Septiyembre sa milabay’ng tuig mao ang “first cropping” apan tungod sa El Niño nakasugod og pananom sa buwan na sa Hunyo hinuon maayo ang ani sa first cropping.
Sa maong sitwasyon ang Kapitolyo mihatag og hinabang ngadto sa mga mag-uuma lakip na niini ang “cash for work”.
Apan niining pagsugod na sa uwan dili gihapon magsadya ang mga mag-uuma tungod kay maproblema usab sila sa mga peste nga mokaon sa ilang mga tanom.
Matud ni Saragena nga kung gikan sa taas kaayong init unya mopuli ang ting-uwan kasagaran ang “locust pest” klase sa dagko nga “grasshoper” o “dulon” manggawas ug pangaunon ang mga tanom. Gibutyag ni Saragena nga kasagaran motugdon sa lungsod sa Medellin, San Remigio ug Daanbantayan. Ang provincial agriculture office nangandam na usab pangontra sa mga peste.
Gawas sa mga peste, hulga ang sobrang pag-uwan sa mga tanom. (BANAT NEWS)