CEBU, Philippines - Nakadawat og bugas nga lagom, baho, dali mapan-os ug kinitkitan pa sa ilaga ang mga tsinelas nga gihatag sa mga biktima sa sunog sa Barangay Guizo ug Mantuyong, Dakbayan sa Mandaue.
Apan si Roger Paller, tigpamaba sa kagamhanan sa dakbayan, nipasabot nga kadaghanan sa gihatag nga bugas sa City Social Welfare Office gikan usab sa lainlaing sektor nga nidonar niini.
Gitataw ni Paller nga dili na masubay kun diin gikan ang bugas nga gireklamo nga lagom tungod kay daghan ang nagdonar alang sa biktima sa sunog.
Gihimo na lang sa mga biktima ang pagkilis sa bugas sa makadaghan ka higayon una pa lung-agon aron mawagtang ang kalagom.
Nangreklamo usab ang mga biktima sa kalisud sa ilang pagkabutang nga naglakip sa kakuwang sa tubig ug pansayan sa nataran sa Cebu International Convention Center (CICC). Samtang tinguha na gyud unta sa mga biktima nga makatukod pagbalik sa ilang panimaye apan nalangan tungod sa gikatakdang reblocking.
Si Paller naneguro sa pagsugod na sa reblocking ug gipaningkamutan nga madali gyod ang paghuman aron makabalik na ang mga biktima gikan sa nahimutangan nila karon. (BANAT NEWS)