Talisay City murag naigo og katalagman—JVR

CEBU, Philippines - Gihulagway ni Talisay City Mayor Johnny “JVR” De los Reyes nga daw naigo sa katalagman ang siyudad tungod sa pagipit kaniya sa konseho maong naglisod siya nga mapadayon ang iyang mga plano ug programa.

Sa   gipahigayong round table discussion sa The Freeman/Banat News, gibutyag ni De los Reyes nga ang paglaslas sa konseho sa budget sa siyudad ilabi na kadtong pundo nga iyaha untang gamiton sa mga programa  maoy hinungdan nga wa niya mapatuman ang mga saad. Usa sa maong mga programa mao ang pagpalambo unta sa sports programs ug mga kalihokan alang sa mga kabataan aron sila malayo gikan sa mga dautang bisyo sama sa drugas.

Gusto unta sa mayor nga ma-divert ang atensiyon sa mga batan-on ngadto sa sports apan tungod sa paglisud-lisod kaniya sa konseho, ang iyaha na lang personal nga kwarta maoy iyang gigamit apan kuwang pa.

“Pero diha sa Talisay karon subo ko kay ang budget karon sa sports, zero, ambot unsay sala sa mga batan-on nga gi-zero nila. Ang atong tourism, zero,” ni De los Reyes pa.

“Nakaingon ko ang atong Talisay naigo sa kalamidad, nalipay ta nga wala gani ta maigo sa bagyong Senyang, ang Talisay nalipay nga wala gibagyo sa  Yolanda pero naigo intawon mi 2015, January 8 naigo og dakung kalamidad ang Talisay pinaagi sa paglaslas sa atong council,” matud ni De los Reyes.   

Si De los Reyes miingon nga hasta unta ang mga plano niya kontra sa ilegal nga drugas naduhig, apan puntariya niya ug mao nalay gitutokan ang pagpauswag sa ekonomiya sa siyudad aron mahatagan og panginabuhian ang mga kabus kay kun way panginabuhian daghan ang mohimo og krimen.

Ug kung mapauswag ang ekonomiya sa siyudad daghan ang mahatagan og trabaho ug wala na unyay mohimo og mga ilegal.

Matud usab ni De los Reyes nga dili dayon masulbad ang problema sa ginadiling drugas kinahanglan kini og plano ug taas nga proseso kay nakagamot na kini pag-ayo tungod sa taas na nga panahon ug gani matud pa aduna pay mga opisyal sa gobiyerno ang nalambigit na niini. Kasagaran karon ang madisgrasya sa mga operations regarding sa pagsulbad sa drugas kadtong hilabihang pobreha kaayo apan ang tuburan nga maoy gikuhaan sa mga stocks dali kaayong makaipsot,” ni De los Reyes pa.

Iyaha usab giklaro nga dihang nilingkod siya sa city hall, ang una niyang gipatawag mao ang mga department heads nga diin iyang gipahimangnoan nga di lisud-lisuron ang mga negosyanteng buot mo-aplay og permit.

Gusto niya nga maganahan ang mga negosyante kay kun sila modaghan daghan usab ang makatrabahong mga taga Talisay, usa lang iyang hangyo sa mga magpapatigayon, kinahanglang mokuha sila og mga kawaning Talisaynon lakip na niadtong mga “over age” ug bisan senior citizens basta may kusog pa ug makamao sa trabaho. Lakip unta sa mga plano niyang buhaton mao ang paghimo og mga alternatibong mga dalan aron di magdasok ang mga sakyanan diha sa Tabunok Public Market ug ang pagtukod og bag-ong edipisyo niini nga adunay parkingan sa ibabaw aron di mahuot sa dalan ang mga sakyanan.

Apan si JVR miingon nga bisan gilisud-lisod siya ug gihimo-himoan og mga pasangil nga naglakip sa isyu bahin sa mga paryente niyang giingong gipatrabaho bisan dili tinuod, nakatabang-tabang siya sa mga Talisaynon. Matud niya, ang 20 percent development fund lang niya isip mayor ug personal nga kwarta maoy iyang gigamit sa paghimo sa iyang mga proyekto ug programa. Giklaro niya nga bisan mapildi pa siya karong piniliay dili siya mapurdoy “basta aduna pay lu-as” pasiaw pa niya. Apan matud niya naguol siya sa mga Talisaynon nga buot gyud unta niyang tabangan. (BANAT NEWS)