CEBU, Philippines - Pasakaan karong adlawa og kasong paglapas sa Republic Act 9287 o Illegal Numbers Games in relation to RA 10175 o ang Cybercrime Prevention Act of 2012 ang lima ka Koreano nga nadakpan sa pagpangronda sa kapolisan sa Sabado sa gabii.
Target unta sa kapolisan nga sikupon mao si Kim Jung Oo,26, nga giingong maoy nagpadagan og online gambling sa nasod diha sa Park Terrace, Sitio Nasipit, Brgy. Talamban, Cebu City.
Apan sa pag-abot sa mga polis, naatlan diha sa sud ang laing upat ka mga kauban niining Koreano nga sila si Dohyeong Kim, 28; Perk Oong Word, 32; Kim Soon Min, 28; Kang Ho Chan, 41.
Armado sa giisyung tulo ka search warrants gironda sa Regional Special Operations Group 7 ang panimalay ni Kim.
Ang search warrants giisyu ni Judge Marivic Trabajo Daray sa RTC Branch 17 niadto’ng March 16, 2016 alang sa kalapasan sa Republic Act 9287 o Illegal Numbers Games in relation to RA 10175 o ang Cybercrime Prevention Act of 2012.
Gipangunayan mismo ni Superintendent Arnold Palomo, RSOG-7 chief ang maong operasyon.
Kini human sa pipila ka buwan nila nga surveillance operation batok sa subject sa maong operation.
Sa pag-implimentar sa search warrants sa tulo ka balay, ang mga polis nakakuha og mga sim cards, pipila ka computers ug kagamitan sa ilang ilegal nga kalihokan.
Ang mga dinakpan kasamtangang gitanggong sa Fuente Police Station. (BANAT NEWS)