CEBU, Philippines - Patay na nga nalandig sa tambalanan ang usa ka construction worker nga biktima sa pagpamusil diha sa Pilipog Bridge, Brgy. Pilipog, Lungsod sa Cordova alas 10 pasado ang takna sa miaging gabii.
Si Police Officer 3 Vilma Degamo sa Cordova Police Station miila sa biktima nga mao si Jose Niño Yangco, 33 , nagtrabaho sa usa ka construction firm ug nagpuyo sa Brgy. Ibabao sa nahisgotang lungsod.
Matud pa ni Degamo nga nakadawat ang ilang buhatan og pahibalo sa pipila ka lumolupyo sa maong dapit labot sa usa ka tawo nga nagkadugo nga nagbuy-od sa maong taytayan.
Sa ilang pag-abot sa dapit, nagginhawa pa ang biktima apan aduna kini samad pinusilan sa liog ug uban pang bahin sa iyang kalawasan hinungdan nga dali nilang gidala sa Lapu-Lapu District Hospital apan pag-abot didto namatay gihapon kini.
Si Degamo miingon nga mohimo pa sila og dugang imbestigasyon sa maong hitabo alang sa pagsuta sa hinungdan sa maong pagpamusil ug ingon man ang pag-ila sa mamumuno.
Sa laing insidente sa pagpamusil, usa ka 42 – anyos nga lalaki ang gipusil patay sa iyang gikalalis sa miaging gabii diha sa Sitio Esperan, Barangay Tungkop, Minglanilla.
Si Andre Cabusas, 42, alyas ‘Andi’ nakabsan sa iyang kinabuhi pipila ka gutlo human siya gitabang sa Minglanilla District Hospital tungod sa samad pinusilan sa iyang tuo nga dughan nga milapos sa iyang likod ug sa tuong bahin sa iyang buko-buko nga milapos sa iyang tiyan.
Samtang ang mipusil mao si Alexander Lopez, 54, nagpuyo sa susamang dapit.
Sa pasiunang imbestigasyon sa grupo ni Police Officer 2 Rustom Elorde sa Minglanilla Police Station, hubog ug may kalalis si Cabusas nga laing tawo apan kalit kining milanit og hait nga hinagiban ug gipangita ang maong lalaki.
Pipila ka minuto ang nilabay, dihang nagkita sila si Cabusas ug Lopez sa nahisgutang dapit naglalis ang duha ug nagbuno hangtud nga nadunggaban ni Cabusas sa dughan si Lopez, apan nakabawos kini pagpusil sa biktima.
Ang suspek nangangkon nga ‘self –defense’ ang iyang gibuhat ug mitahan kini sa kapolisan uban ang kalibre .357 revolver nga adunay duha ka basiyo sa bala, ug duha ka buhing bala. (Romeo T. Limpangog, Shimron Suarez, Benedicto College Intern ug Lorjerist G. Llanto /EIM )