CEBU, Philippines - Patay diha-diha ang 32-anyos nga babaye human pusila sa ulo sulod sa usa ka KTV Bar sa A. Lopez St., Calamba, Dakbayan sa Sugbo pasado alas 11 sa nakalabay nga gabii.
Ang biktima giila nga si Elisa delos Reyes II, minyo nga taga Tres de Abril, Barangay Punta Princesa.
Matud ni Senior Police Officer 4 Rogelio Cañete, imbestigador sa homicide section sa Cebu City Police Office, nga samtang nalingaw og kanta-kanta ang biktima sulod sa KTV Bar, usa ka lalaki ang naabot dayon pusil sa ulo sa biktima.
Human sa pagpamusil, yano ra usab kaayo nga nilakaw ang gunman dayon sakay sa usa ka motorsiklo ug nisibat.
Dugang kasayuran nga nakuha sa kapolisan nga daw sa adunay gipaabot nga higala o kaila ang biktima sa KTV Bar ug kini nisabay lang sa pagkanta-kanta sa grupo sa mga batan-on una pa gipusil.
Sumala pa ni Cañete nga personal nga anggulo ug ilegal nga drugas ang ilang gisundan nga motibo sa insidente.
Sigun pa ni Cañete nga kung basehan ang dagan sa pagpatay, klaro kaayo nga may daku’ng kasuko ang gunman sa biktima kay giulo man gyud kini sa pagpusil.
Suway pa unta nga gitabang si delos Reyes apan nakabsan gyud kini sa kinabuhi human nilapos ang bala sa ulo paingon na sa liog.
Narekober sa kapolisan sa crime scene ang usa ka kabhang sa bala sa.45 caliber pistol. (BANAT NEWS)