Kanhi police official gidakop

CEBU, Philippines - Hustisya ang gisinggit karon sa usa ka kanhi opisyal sa kapolisan nga natanggong sa Parian Police Station human gidakop gumikan sa kasong gipasangil nga pagpanglugos.

Ang dinakpan naila nga si kanhi Senior Inspector Donald Geniston, kanhi hepe sa Sante Fe Police Station gidakop diha sa ilang balay sa Sitio Itom Yuta, Barangay Lorega San Miguel ning dakbayan kagahapon.

Ang pag-aresto pinasikad sa warrant of arrest nga gi-isyu ni Judge Jose Nathaniel Andal nga gipagawas kaniadtong Enero 8 ning tuiga.

Si Geniston nga nahinabi sa Banat News miingon nga upat ka tuig na ang nakalabay dihang gipasanginlan siya sa usa ka 16 anyos.

Matud pa ni Geniston nga ang maong 16 anyos ilang gipapuyo sa ilang balay aron makapadayon sa pag-eskuyla gumikan usab sa iyang kalooy.

Nagduda si Geniston nga politika ang motibo sa maong reklamo kay ang pasangil migawas sa dihang midagan pagka kapitan sa ilang barangay ang iyang amahan niadtong 2012 nga eleksyon.

Ang maong kaso usab ang hinungdan nga na-dismiss kini sa iyang serbisyo niadtong tuig 2014 nga iyaha pang giapelar sa Ombudsman.

Mireklamo si Geniston nga wala gayod kini nakadawat og bisan usa ka kopya sa reklamo nga gipasaka kaniya gikan sa kaso sa Ombudsman hangtod nigawas ang warrant of arrest. Sigun pa niini nga sa iyang nasayran adunay nipugos sa pamilya sa bata nga ipadayon ang kaso bahala na og unsay mahitabo.

“Wala pa sila natagbaw nga natangtang ko sa trabaho, gusto pa gyod nila nga mapriso ko, sige lang naa ma’y Ginoo nagtan-aw kabalo mana siya nga wala koy dautan nga gihimo,” dugang pa ni Geniston.  (BANAT NEWS

Show comments