Nagtuong tawo nga gi-salvage, iro diay

CEBU, Philippines - Nabulabog ang mga sakop sa Homicide Section sa Cebu City Police Office kagahapon sa hapon tungod sa usa ka tawag sa telepono nga nagpahibalong adunay tawo nga gituohang gi-salvage ug gisud sa sako sa hilit nga bahin sa Brgy. Busay.

Apan na “wow mali” ang kapulisan human nga di diay tawo ang sud sa sako, usa ka dako ug mahalong iro.

Sumala pa ni Police Officer 3 Winston Ybañez, usa sa mga imbestigador miingon nga ang drayber ni Cong. Benhur Salimbangon nanawag ug nipahibalo sa maong  kadudahang sako nga naagian niining gitapuk-an sa mga drayber sa habal-habal.

Sa paghiling sa kapulisan ilang nakita nga giputos kini og panapton nga gilibot pa sa pagputos og plastic tape dayon giputos pa og plastic nga dili na gayod makita nga usa ba diay ka hayop ang anaa sa sulod.

Apan sa dihang ilang gilaslasan ang plastic misiwil ang ulo sa iro nga paingon na sa pagkadugta.

“Pastilan kay misiwil man ang simod sa iro, nangatawa na lang mi,” dugang pa ni Ybañez. (BANAT NEWS)