CEBU, Philippines - Gumikan sa dautang panahon dili na mahinayon ang Pilgrim Walk gikan sa Lapu-Lapu padung sa Mandani Bay sa Mandaue City karong adlawa.
Kini maoy gibutyag ni Lapu-Lapu City Mayor Paz Radaza atol sa iyang kinalit nga press conference kagahapon sa buntag diin pinal na ang maong desisyon bisan og moinit pa pagbalik karong adlawa, Enero 28.
Nasayran nga imbes nga manglakaw padung sa Mandaue City, ang mga delegado sa Pilgrim Walk anha na lang motuyok sa Lapu-Lapu City balik sa Hoopsdome alang sa himuong vigil.
Ang rota manukad sa Hoopsdome, liko sa Humay-Humay Road, liko sa MVP Avenue padulong sa MLQ sa Pajo, diretso sa sa G.Y Dela Serna St. dayon liko sa wala balik sa sa Hoopsdome. Ang Philippine Atmospheric, Geophysical and Astronomical Service Administration (Pagasa) miingon nga ang nasinating pag-uwan molungtad hangtud ning adlaw’ng Huwebes.
Ang organizer sa youth day nga sila Father Kit Sestoso ug kaubanan miingon nga lisod kaayo alang sa kabataan tungod sa kadautan sa panahon.
Matud ni Radaza, kun maghisgot og seguridad diha sa Hoopsdome dili na kini problema sanglit ang mga pulis nga i-deploy sa maong dapit gipaubos na man og briefing.
Dugang ni Radaza, ang mga portable toilet, concessionaires hinay-hinay na nga gipamalhin sa Hoopsdome ug gitataw usab niini ang tanang bakanteng kwarto kilid sa maong edipisyo mahimong gamiton aron pag-akomodar sa mga kabatan-onan.
Tungod gihapon sa pag-ulan, gibahaan ang Campaña Maritima diha duol sa Devotee City sa may Cebu City Hall nga diin gipahimutang ang mga libud-suroy ug mga sidewalk vendors nga naninda atol sa IEC nga way makatulgan dinhi sa siyudad.
Si Konsehal Roberto Cabarubias mitug-an sa Banat News nga ibalhin una nila sa ikaduhang andana ang mga gipakatulog didto lakip na kadtong nagpundo sa Devotee City. Karong adlawa habwaon ang tubig sa maong building. (BANAT NEWS)