CEBU, Philippines – Patay na nga napalgan ang usa ka tawo nga nagbuy-od daplin sa karsada sa Purok 1, Bangbang, Lungsod sa Cordova alas 2 pasado sa niagi’ng kadlawon.
Si Police Officer 2 Vilma Degamo niila sa biktima nga si Maximiano Samson Tumulak, Jr., 37-anyos, may kapuyo ug wala’y trabaho nga nagpuyo sa maong dapit.
Matud ni Degamo nga usa ka traysikad drayber nga si Jose Guarin, hingkod nga taga Purok 2 sa maong barangay, ang nahiagi sa dapit ang nakasigpat sa biktima nga nagbuy-od daplin sa karsada.
Dugang ni Degamo nga natingala si Guarin nga nagtan-aw sa nagbuy-od hinungdan nga iyang gisusi.
Maoy nakita ang biktima nga naligo na sa kaugalingong dugo ug patay nga maoy nakaaghat kang Guarin sa pagpadangat ngadto sa kapolisan.
Si Degamo niingon nga samad dinunggaban sa bukobuko ang naangkon sa biktima nga maoy nakaingon sa hinanali niining kamatayon. – /GMR) (BANAT NEWS)