CEBU, Philippines - Magpatabang sa Cebu Provincial Police Office ang bise mayor sa Lungsod sa Asturias nga si Joel Dumdum human nakadawat og paskin sa pagpanghulga nga gibutang sa buwangan sa Barangay Matab-ang, Dakbayan sa Toledo niadto’ng Domingo.
Matud ni Dumdum nga duha ka tawo ang nakit-an sa mga tawo nga nagbutang sa tarpaulin sa atubangan ug sa kilid sa buwangan nga iya’ng giabangan.
“Naay gibutang ngadto nga naa’y nagsunod-sunod nimo nga drug lord nga gustong mobuak sa imong ulo,” matud ni Dumdum.
Usa ka testigo nitug-an ni Dumdum nga ang gisakyan sa duha ka tawo red plate nga sakyanan.
Nahibawo na si Dumdum sa plate number apan nagdumili pa sa pagtug-an.
Base sa kuha sa video sa CCTV, ala 1:08 sa kadlawon nakuha sa CCTV ang usa ka sakyanan nga dunay puwa nga plate number ang nibiya sa buwangan diin ala 1:20 nakuha usab sa CCTV sa iyang opisina sa Barangay Buanoy, Balamban ang maong sakyanan nga paingon sa norte nga bahin.
Apil ang duha ka tawo ang nakuhaan usab sa CCTV nga kini hayan maila sa mga testigos.
Sa pagsubay sa tarpaulin nakita sa likod niini ang kombinasyon sa swertres ug nagduda ang bise mayor nga lagmit dunay kalabutan sa ilegal nga sugal ang pagpanghulga.
Gusto ni Dumdum nga mailhan gyud og klaro ang sakyanan nga gigamit kung kini nagdala ba og red plate.
Gipasabot sa bise mayor nga dili na kini mokompiyansa kay ikaduha na kini nga higayon nga nakadawat sa susamang pagpanghulga maong plano niya nga magpatabang sa kapolisan. (BANAT NEWS)