CEBU, Philippines – Usa ka inahan ang nangayo og tabang sa Criminal Investigation and Detection Group-7 human nga ang iyang anak wala na nakauli sa ilahang balay sulod sa usa ka bulan ug iyang gituohang gi-kidnap sa iyang ka textmate niadtong Disyembre 20, 2015.
Si Marife Silador, nga taga Barangay Canjulao, dakbayan sa Lapu-Lapu ang nangayo og tabang sa CIDG-7 human nga wala’y nahitabo sa gihimong imbestigasyon sa Cordova Police Station.
Sumala pa ni Silador nga milakaw siya sa ilang balay tingpaniudto niadtong Disyembre 20, aron motambong sa Christmas party samtang ang iyang anak nga si Mary Jane, 15, ang nabilin sa ilang balay.
Apan sa iyang pagbalik nawala na ang iyang anak. Adunay nakasulti kaniya nga milakaw ang bata kay makigkita sa iyang “textmate” apan wala na nabalik.
Sumala pa sa inahan nga katapusang nakaestorya niini ang iyang anak niadtong Disyembre 26, 2015 ug kini miingon atoa kini sa Cordova apan naputol ang panag-estorya ug dunay lalaking mitubag sa pikas linya nga nag-ingon:“di nani mouli si Joy-Joy sa inyo.”
Si Superintendent Fermin Armendarez III, deputy chief sa CIDG-7 miingon nga base sa pamahayag sa inahan gibawalan sa komunikasyon ug sa ilang tan-aw hasta ang kagawasan sa bata gidili sa tawong nagpugong niini.
Si Armendarez miingon nga dako ang posibilidad nga usa ka kaso nga “serious illegal detention” ang nahitabo sa 15 anyos. – /EIM) (BANAT NEWS)