CEBU, Philippines – Nadugangan og duha ang gituohang nakalas sa dengue sa Dakbayan sa Toledo.
Kini ang gibutyag ni Antonio Layan Jr., sanitary inspector sa Toledo City Health Department.
Matud sa opisyal nga ang mao’ng mga bata pulos wala pa magtungha nga managsilingan sa sitio Baybay, Poblacion.
Subay niini, walo ang nakalas sa sakit nga dengue sa dakbayan sa pagtapos sa tuig 2015.
Gumikan sa mga kaso sa dengue sa siyudad, ang CHD mopahigayon og misting operation.
Kapin sa 100 ang natala nga kaso sa dengue hinungdan nga ang siyudad nahimutang sa ika-unom sa Rehiyon 7.
Subsob nga information drive kalabot sa dengue ang gipatuman sa CHD ingon man pag-awhag sa katawhan sa pagpanglimpiyo sa palibot. Giawhag usab sa CHD ang mga ginikanan nga kung adunay timailhan ang ila’ng mga anak sa dengue, dad-on dayon kini sa tambalanan aron masusi. – /GMR) (BANAT NEWS)