Pagbuwag sa BFAR sa DA wa pay klaro

CEBU, Philippines – Nag ung-ong pa gihapon sa kongreso ang gipalabang nga balaudnon aron himuong usa ka departamento ang Bureau of Fisheries and Aquatic Resources (BFAR) buwag sa Department of Agriculture. Apan sumala ni BFAR-7 Assistant Regional Director Allan Poquita malaumon gihapon siya nga mapasar ang maong balaudnon aron makabaton og kaugalingong budget ang nahisgutang ahensya nga dili na magsalig ug mag-agad pa sa Department of Agriculture (DA), ang mother agency.

Si Poquita miingon usab nga nagkinahanglan usab kini og dakong pundo aron mas epektibo pa ang paglihok sa nahisgutang bureau.

Usa sa mga paagi aron makabaton kini og kaugalingong budget ug autonomiya, matud ni Poquita, mao ang paghimo niini nga usa ka departamento, masiguro ang pagpalambo sa industriya sa panagat ug pangisda sa nasud.

Kini ubos sa pagpalapad ug pagpalambo sa ilang programa sama sa training services, unit support technical assistance, aqua-culture ug uban pang kalamboan. Sa gihimong forum sa mga mananagat ug uban pang stakeholders didto sa kaulohan niadtong Oktubre sa miaging tuig, daghang mga sektor sa mga mananagat ang mipadayag sa ilang tinguha nga mabuwag gyud ang BFAR sa DA. – /EIM) (BANAT NEWS)