CEBU, Philippines - Namatay ang tigulang babaye dihang kalit siya nga nadam-agan og 10-wheeler wing van didto sa national highway sa Barangay Pitogo, Consolacion kaniadtong Sabado sa buntag.
Si PO1 Retchie Guilleran sa Consolacion Police Station miingon nga si Celerina Comendador, 67-anyos, taga Barangay Bungdo, Borbon, namatay diha-diha dayon tungod sa kakusog sa pagkalamba niya sa karsada.
Ang wing van nga nakadasmag ni Comendador gimaneho ni Vicente Bajo Jr., 31-anyos, nga taga Barangay Cotcot, Dumanjug. Si Bajo daling mitahan ngadto sa kapolisan.
Matud ni PO1 Guilleran nga molabang na unta sa karsada si Comendador apan sa pag-abot niini sa taliwala sa karsada, mihunong kini ug miatras, mao nga nadam-agan.
Tungod sa kakusog nga impact, ang tiguwang nalamba sa karsada ug maayong pagkapantok ang ulo sa semento.
Ang kapolisan mopasaka og kaso nga reckless imprudence resulting to homicide batok ni Bajo kun dili sila magka-settle ug ang kabanayan sa namatay. (BANAT NEWS)