CEBU, Philippines – Patay ang usa ka head guard sa usa ka security agency human nga gitabangan kini pagpusil sa managsuon nga nasuko dihang gitaktak sila sa trabaho atol g’yud nga ilang pagdawat sa ilang sweldo pasado alas-5 niadtong Sabado sa Barangay Tulay sa lungsod sa Minglanilla.
Gideklarar na nga dead on arrival sa Minglanilla District Hospital si Charlie Muradas, head security officer sa Invincible Armada Security Agency nga na-assign sa Fonte Di Versailes Subdivision.
Misibat dayon ang managsuon nga si Edcel ug Elmer Franza, molupyo sa maong lugar, trabahante sa Paramount Property Ventures, Inc. isip mga laborers.
Sumala pa ni Police Officer 2 Vincent Aliñabo, desk officer, nga ang mga suspek naglinya kauban sa ilang mga katrabaho sa Club House sa maong subdivision aron kubrahon ilang sweldo.
Niadtong tungora si Rhea Rendon, Human Resources Officer, maoy nanghatag sa ilang mga sweldo inubanan sa security guard nga si Jose Batad, 27.
Apan dihang ang managsoon na ang modawat sa sweldo nakugang ang duha dihang gipahibalo sila sa HR Officer nga kataposan na nila kadto nga sweldo kay gitaktak na sila sa trabaho.
Sumala pa nga nakiglalis ang duha ka suspek kang Rendon hinungdan nga mipakgang si Muradas aron di magdako ang kagubot.
Apan igo ra gyu’ng nakaingon og: “ani na lang” si Muradas dihang gitabangan siya pagpusil sa managsuon gamit ang wala pa matino nga kalibre sa armas.
Naigo ang biktima makatulo ka higayon sa likod sa iyang ulo ug makaupat ka higayon sa iyang lawas hinungdan sa paglukapa niini sa ubos.
Ang managsuon kalma ra nga naglakaw pagawas sa subdivision samtang ang security guard nga si Batad wa gyud makalihok tungod sa iyang kakugang sa kapaspas sa panghitabo.
May nanawag og tabang ngadto sa Minglanilla Police Station human sa hitabo ug sa pag-abot sa polis gidala si Muradas sa Minglanilla District Hospital apan patay na kini sa iyang paghidangat sa tambalanan.
Ang mga imbestigador naka-rekober og 11 ka bala sa kalibre .45 nga bala diha sa crime scene.
Dugang ni Aliñabo nga gimando na sa hepe sa Minglanilla Police Station Chief Inspector Franco Rodolf Oriol nga gilusad na ang manhunt operation batok sa managsuon. – /EIM) (BANAT NEWS)