CEBU, Philippines - Patay ang usa ka buko bar vendor nga nagsakay og biseklita human nabiktima sa hit and run sa motorsiklo sa Lungsod sa Sibonga sa niagi’ng gabii.
Ang biktima giila nga si Benosto Lazaga Potestas, 60, nagpuyo sa Barangay Manatad, Sibonga.
Sigon sa report nga nadangat sa Cebu Provincial Police Office, ang biktima paingon na unta mopauli sa ila’ng panimalay.
Wala nakabantay ang biktima nga dunay naghaguros nga motorsiklo nga iya’ng gikasugat hinungdan nga maayo niya’ng pagkaigo ug nalagpot sa sementado’ng karsada.
Si Potestas nakaangkon og grabe’ng samad, bun–og ug pangos sa nagkadaiya’ng parte sa lawas hinungdan sa hinanali’ng kamatayon.
Ang wala mailhi’ng drayber sa motorsiklo ang nisutoy sa pagpadagan biniyaan ang biktima nga nagbuy-od.
Ang biktima gidala sa Dr. Dieparine Medical Clinic apan gideklarar na kini nga dead on arrival. (Lorjerist G. Llanto, USJ-R Intern/GMR)(BANAT NEWS)