CEBU, Philippines – Gipasidungan sa Cebu City Anti-Drug Abuse Council (CADAC) ug Cebu City Office on Substance Abuse Prevention (COSAP) ang duha ka barangay ug duha ka opisyal atol sa pagtapos sa Drug Awareness Prevention Month.
Ang duha ka barangay mao ang Labangon ug Budlaan isip Best Barangay Anti-Drug Abuse Councils (BADAC) 2015.
Gihatagan usab og Lifetime Achievement Award sila si kanhi kongresista Antonio Cuenco ug retired Police General Carmelo Valmoria tungod sa ilang daku’ng kontribusyon sa kampanya batok ilegal nga drugas.
Napulo ka barangay ug duha ka publiko’ng tunghaan ang nakadawat usab og award isip Drug-Free Workplace nga mao ang Pulangbato, Taptap, Budlaan, Lusaran, Kamagayan, Tabunan, San Jose, Pari-an, Banilad, Pamutan ug ang Talamban National High School ug Bulacao Community School-Elementary.
Si Cebu City acting Mayor Edgardo Labella malipayon sa kalampusan nga nabuhat.
Dugang ni Labella nga malipayon usab siya nga ang tanang opisyal sa dakbayan apil na ni Mayor Michael Rama ug mga konsehal ang wala nagpositibo sa drug test.
Iya’ng giawhag ang padayon nga pakigbisog batok ilegal nga drugas. – /GMR) (BANAT NEWS)