CEBU, Philippines - Nangandam na ang kaparian sa Cebu Metropolitan Cathedral nga gipangulohan ni Msgr. Ruben Labajo sa pagbukas sa Jubilee Door alas 8 sa buntag karong Domingo.
Matud ni Labajo nga human sa kasaulogan sa 75th Year Celebration sa Archdiocese of Cebu, giselyuhan na ang Jubilee Door sa Cathedral hinungdan nga ila lang usa gilimpyuhan ug nagpabilin nga selyado hangtud nga kini buksan.
Alas 8 sa sa buntag karong Domingo, usa ka mubo nga seremonyas ang pagabuhaton ni Archbishop Jose Palma ug isunod ang Santos nga Misa.
Gibutyag ni Labajo nga ang pagbukas sa Jubilee Door mao usab ang pagbukas sa Year of Mercy and Compassion.
Matud ni Labajo nga aron makabaton og plenary indulgence ang usa ka tawo sa iya’ng pagsulod sa Jubilee Door, kinahanglan nga nakakompisal kini ug mangadye og I Believe in God, usa ka Amahan Namo, usa ka Maghimaya Ka Maria ug usa ka Himaya sa Amahan nga ipahinungod sa Santo Papa lakip ang pagsimba ug pagkalawat.
Si Palma nipahibawo nga gawas sa Cathedral, laing simbahan nga buksan ang Jubilee Door mao ang Saint Catherine de Alexandria sa Dakbayan sa Carcar, San Vicente Ferrer Parish sa Bogo City, Saints Peter and Paul sa Bantayan Island ug St. Joseph Church sa San Francisco, Camotes Island. (BANAT NEWS)