CEBU, Philippines - Usa ka 18-anyos nga batan-ong inahan nasakpan sa akto nga migamit sa iyang 10-anyos nga pag-umangkong babaye paghimo sa malaw-ay nga pasundayag atubangan sa video camera sa iyang cellphone.
Lima ka menor de-edad ang na-rescue sa mga miyembro sa Inter-Agency Task Force Council Against Trafficking didto sa Sitio Talong, Barangay Cogon, Cordova. Si Atty. August Eric Isidoro sa NBI-7 miingon nga ang babaye dugay na nilang gipanid-an pinaagi sa pag-abag sa US Homeland Security. Giangkon sa suspek ang salaod dungan sa pagpangayo og pasaylo sa iyang nahimo tungod kay ang kalisod maoy nagtukmod kaniya sa paghimo sa krimen. Lakip sa gitanggong ang iyang 22-anyos nga kapuyo. Si Mayor Adelino Sitoy nipadayag nga isolated case ang labing bag-ong kaso sa cyber pornography sa lungsod.
Matod sa mayor, wa sila magkuwang sa pagpahimangno ug pag-abag sa ilang mga lumolupyo. Samtang si CPPO director Noel Gillamac nagkanayon supak ang kapolisan nga tawgon nga cyber porn capital ang lungsod sa Cordova. Matud pa ni Gillamac nga gawas sa Cordova duna pa’y laing mga dapit sa probinsya ang duna’y presensya sa maong kalihokan nga padayon usab nila nga gimonitor. (Jojo C. Ugdol Rowena D. Capistrano, Christell Fatima Tudtud/RUB)