CEBU, Philippines - Dakpon sa mga polis kadto’ng mga manaygunay sa Dakbayan sa Sugbo nga wala’y permit.
Kini ang gibutyag sa hepe sa Police Community Relations sa Cebu City Police Office, Chief Insp. David Señor.
Matud ni Señor nga ila na’ng gilauman nga mosaka ang gidaghanon sa mga manaygunay karong panahona ilabi na nga nagkaduol na ang Pasko.
Usa sa gusto’ng mapahunong sa kapolisan kadto’ng manaygunay sulod sa mga jeepney ug bus nga mokalit lang og sakay dayun manaygon.
Apil sa dakpon sa mga polis kadto’ng mga mag-rap sulod sa jeepneys nga mangayo og kwarta.
Ang mga minor de edad nga manaygon ug mag-rap sa mga sakyanan dakpon ug itugyan sa Department of Social Welfare and Development.
Apan kadto’ng mga hamtong na, pasakaan og kaso sa kalapasan sa ordinansa sa siyudad.
Hinuon kadto’ng mga manaygunay nga may sakto’ng permit ang tugutan nga makapanaygon. (BANAT NEWS)