CEBU, Philippines - Ang hunta probinsiyal sa Sugbo miawhag nga usbon ang sistema sa pagdumala sa mga provincial ug district hospital aron wala nay mahitabo sama sa kaso sa Minglanilla District Hospital nga adunay bata nga namatay tungod sa pagpasagad.
Atol sa budget hearing didto sa Kapitolyo kagahapon, si Bise Gobernador Agnes Magpale mibutyag nga atol sa gipahigayon nila nga committee hearing ilang nasuta nga may sayop sa sistema sa mga hospital sa probinsiya ug buot nila kining mausab aron dili na masubli pa ang nahitabo sa Minglanilla District Hospital. Usa ka bata nga gidala sa iyang inahan didto sa Minglanilla District Hospital namatay kay wala kini atimana sa mga doktor tungod kay ang iyang inahan wala makapalit sa tambal nga giresita.
Ang hunta probinsiyal misugyot nga ang matag hospital sa probinsiya kinahanglang adunay help desk nga ibutang.
Ang help desk adunay personnel nga idestino sulod sa 24 oras nga moabag sa mga pasyente aron maatiman ang ilang mga gikinahanglan.
Si Magpale nagkanayon nga importante kaayo kun anaa kanunay sa tambalanan ang hepe sa hospital aron masulbad dayon ang mga problema.
Si Bokal Peter John Calderon nagkanayon nga kinahanglang ipaubos og re-training ang mga chief of hospital o hospital staff ug pasabton nga sila silotan kun dili makatuman sa ilang gimbuhaton.
Subay niini gikwestiyon sa mga opisyal sa probinsiya ang gisugyot nga budget sa Provincial Health Office (PHO) kun tukma na ba kini alang sa ilang panginahanglanon.
Ang PHO misugyot og P433.8 milyones nga budget alang sa tuig 2016. Karong tuiga ang PHO adunay P409.3 milyones nga budget ug P239.5 milyones niadtong 2014.
Base sa gisugyot nga budget alang sa 2016, nasuta nga mikunhod ang gigahin alang sa mga tambal ngadto na lang sa P15 milyones gikan sa P35 milyones sa miaging tuig.
Si Bokal Grecilda Sanchez mikuwestiyon niini tungod kay nabalaka siya nga magkuwang na usab unya ang mga tambal, apan si Budget Officer Danilo Rodas mipasabot nga ang ubang tambalanan sa probinsiya gipaubos na sa consignment basis. (BANAT NEWS)