CEBU, Philippines - Gipangronda sa mga sakop sa Talisay City Police Station ang mga illegal suertres nga outlets subay sa kamandoan sa Police Regional Office (PRO-7) nga hingusgan ang pagsumpo sa ilegal nga sugal sa lalawigan,
Ang TCPS pinanguluhan ni Supt. Germano Mallari mironda sa Barangay Poblacion ug sa Tabunok, Bulacao ug San Isidro.
Unom ka mga tawo ang ilang nasikop kinsa maoy tigbantay sa illegal swertres outlets. Sila mao si Meralyn Bandilon Modlon, Kimberly Pacana, Ella Fereja, Ricardo Labajo, Jeanina Cabrera ug Julie Ann Barera.
Matud pa ni Mallari nga nakabantay ang uban ug daling nakapanghipos apan matud niya, patilaw pa lang kini.
Si Kapitan Raul Cabañero sa Barangay Bulacao ug mao ang presidente sa Association of Barangay Council (ABC) ang nipatawag og special meeting ug nireklamo batok niining nagkagrabe nga illegal swertres sa kabarangayan. Iyang gisaway si Mayor Johnny de los Reyes kay wa kini “political will” pagsumpo sa maong ilegal nga kalihukan.
Apan ang mayor miingon nga dili angay mokomentaryo si Cabañero kalabot sa sugal kay kini nadakpan man usab kaniadto gumikan sa pagduwa og mahjong inay nga motabang sa taga National Bureau of Investigation (NBI) sa ilang gipahigayon nga pagpangronda sa illegal nga drugas diha sa iyang barangay.
Si delos Reyes miingon nga dili angay sikopon ang illegal nga swertres tungod kay luoy ang mga nanginabuhi niini. "Kaning swertres arang-arang na lang ni kaysa mangutkot og bas ug graba ug sa illegal nga drugas," matud pa sa mayor. Nagplano karon ang mayor nga mandoan si Mallari nga hunongon ang pagpanakop niini kung di sila makahatag og desenteng trabaho sa mga nanginabuhi niini. (BANAT NEWS)