CEBU, Philippines – Gikondenar sa Regional Director sa National Commission on Muslim Filipinos Malo Manonggering ang terror attack sa Paris, France samtang si Gob. Hilario Davide III nabalaka kun adunay mahitabong susama niini sa Sugbo.
Si Manonggering miingon nga walay relihiyon nga magtudlo sa iyang mga sumusunod paghimo og mga kadaut ug pagpatay sa iyang isi’g ka tawo.
Matud pa niya, kadtong naghimo niini walay relihiyon ug kaugalingon lamang niini nga katuyoan ang gisunod. Sumala pa niya gigamit lang sa mga terorista ang relihiyon tungod sa kahakog sa gahum.
Dili usab sila motugot nga maghari ang kagubot dinhi sa Visayas, kay sa pagkakaron, maayo ang relasyon ug nagsinabtanay ug nagrespetahay ang mga Kristiyano ug Muslim dinhi sa Sugbo.
Si Manonggering nagkanayon nga dili angay himuong sumbanan ang gihimo sa Islamic State of Iraq and Syria (ISIS) tungod kay wala kini masubay sa pagtulon-an sa Islam.
Sa ipahigayong tigom sa Regional Peace and Order Council (RPOC) meeting sa sunod buwan gikatakdang ipatawag ni Davide ang hepe sa National Intelligence Coordinating Agency (NICA) aron magpaubos sila sa briefing bahin sa terorismo.
Sa laing bahin, si Mayor Michael Rama nanawagan nga dili angay kahadlokan ang mga Muslim tungod kay dili tanan kanila mga terorista . – Brenda Batuto ug Sheriza Mae R. Uy) (BANAT NEWS)