CEBU, Philippines – Ang mga hepe sa district ug provincial hospitals sa probinsiya gipangayoan og mga listahan sa mga nangamatay nga pasyente diha sa mga tambalanan nga gidumala sa lalawigan aron matan-aw unsay mga kuwang nga kinahanglang maangkon sa maong mga tambalanan.
Kini human sa nahitabong mga insidente sa pagkamatay sa mga batang pasyente sa Minglanilla District Hospital nga diin gibasol sa mga hospital staff ang kakuwang nila sa gamit, samtang ang mga ginikanan nibasol sa pagkawalay balatian sa mga hospital staff kay sila dili magtagad sa pasyente.
Si Gob. Hilario Davide, III mibutyag nga iyang gimandoan ang mga hepe sa mga provincial ug district hospitals sa probinsiya lakip kang Dr. Cynthia Genosolango kinsa maoy hepe sa Provincial Health Office (PHO) patun-an ang mga kaso sa mga nangamatay nga pasyente gikan sa buwan sa Enero niining tuiga.
Kini aron mahibaw-an kung duna bay pagkuwang ang doktor sa tambalanan o ang tambalanan ba maoy kuwang og suplay sa tambal o gamit pagtabang sa mga pasyente. Ang mga hospital chiefs mitug-an nga sagad sa mga pasyenteng dad-on kanila kun himatyunon na.
Apan si Davide nagkanayon nga kinahanglang taas og pailob ug atimanon gyud ang pasyente hasta ang mga tagtungod ilabi na kadtong mga kabus. – /EIM) (BANAT NEWS)