CEBU, Philippines - Hapit madagit ang duha ka tinun-an sa Bulacao Community Elementary School niadtong Martes ug Miyerkules atol sa tingpaniudto.
Naalarma ang mga magtutudlo human ang duha ka tinun-ang babaye ang nitaho nga hapit sila dagita sa mga wala mailhing lalaki.
Matud ni Bianca Anna Chavez, teacher-in-charge, nga niadtong Martes ang 10-anyos nga tinun-an sa Grade 4 giingong gihaylo og ice candy sa usa ka lalaki’ng nagtaptap og tualya.
Laing insidente nahitabo niadto’ng Miyerkules diin ang classmate sa nahauna ang giingong gihunungan og lalaki nga nag-motor sa highway duol sa skywalk sa eskina padulong sa tunghaan.
Giingong kalit gihalog ang bata sa nag-bonnet nga nag-motor apan nahapak sa bata mao’ng nakalingkawas.
Ang insidente gisumbong sa barangay hall ug sa Pardo Police Station.
Nipahimangno ang mga magtutudlo sa kabataan nga dili mogawas kung wala’y kuyog nga dagku, guardian, magtutudlo ug ginikanan.
Gihangyo usab nila ang mga ginikanan nga padad-an na lang og bawon ang mga anak aron dili na mogawas.
Ang kapolisan nagbutang na usab og beat patrol police duol sa tunghaan ilabi na panahon sa pagpanggawas ug break sa mga tinun-an. (BANAT NEWS)