CEBU, Philippines - Usa ka hulagway sa batan-ong lalaki nga nagsul-ob og uniporme sa pulis ang mikatap sa social media nga matud pa dili diay tinuod nga polis kondili, ‘idol’ lang niya ang mga tinugyanan sa balaod.
Ang maong lalaki kanunay makit-an sa barangay Maguikay sa siyudad sa Mandaue kinsa nasubay sa kapolisan ug gibadlong kay nagpakauwaw sa imahe sa PNP.
Si Senior Superintendent Mariano Natuel Jr., City Police Director sa Mandaue City Police Office(MCPO) mibutyag nga niadtong miaging semana si Mandaue City Mayor Jonas Cortes miasoy kaniya bahin sa maong tawo nga pirmeng magsul-ob og PNP uniform diha sa maong dapit.
Tungod niini ilaha kining gisubay ug ilang nasuta nga ang maong batan-on anak sa usa ka job order employee sa Mandaue City Hall apan nadestino ang amahan isip drayber sa mobile patrol sa MCPO.
Nahibaw-an usab nila ni Natuel nga sukad pa sa pagkabata sa maong batan-on idolo na niini ang mga pulis ug gani bisan sa gamay pa kini hilig na gyud kini magsul-ob og uniporme sa kapulisan, apan matud pang Natu-el nga ilang nasayran nga aduna kini kakulian sa pangisip.
Apan gipahibalo ni Natuel nga kalapasan sa balaod ang gibuhat sa maong batan-on mao nga ilang gitambagan nga di na kadto usbon ug badlungon na gyud siya kun buhaton niya kini pag-usab. (Decemay P. Padilla/EIM)(BANAT NEWS)