Maestro nga nanisko giluba patay

CEBU, Philippines – Wala na natabang pa sa mga doktor ang usa ka 42-anyos nga maestro human kini giluba sulod sa diskohan diha sa barangay Maluray sa lungsod sa Dalaguete, sa nakalabay nga kaadlawon.

Ang biktima giila nga si Raul Paz, nagpuyo sa barangay Casay sa maong lungsod ug nagtudlo sa Barangay Malunes Elementary School sa maong lungsod.Samtang ang suspek mao si Crispin Tangpos, kapin 50-anyos ang pangidaron ug nagpuyo sa nahitaboan.

Matud pa ni Police Officer 3 Jehaziel Huyo-a ang desk officer sa Dalaguete Police nga nahinabi sa Banat News naabot ang maong maestro sa maong barangay kay taga didto ang iyang asawa kay sila namista.

Adunay diskoral nga gihimo og apil nga naglingawlingaw ang maestro kauban ang iyang mga silingan, apan sa kalit lang natripingan kini sa suspek nga hubog niadtong tungora ug gidiretso kini og dunggab makadaghan nga higayon diha sa lingkoranan.

Ang mga kauban ni Paz misulay pagsikop sa suspetsado apan nakahigayon kini og lugnot ug nakasibat. Sulod sa Julio Cardinal Rosales Memorial Hospital sa maong lungsod nakabsan sa iyang kinabuhi ang maestro nga nakangkon ug daghanang lawom samad dinunggaban. – /EIM) (BANAT NEWS)