Alang sa hapsay nga ‘Kalag-Kalag’

CEBU, Philippines - Nakompleto na ang tanang pagpangandam aron magmalinawon ug hapsay ang pag-obserbar sa Adlaw sa mga Santos ug sa mga Kalag karong Domingo ug Lunes.

Ang mga opisyal sa Land Transportation Office (LTO)-7 mipatawag kagahapon sa mga bus operators ug sila gipahimangnoan nga motuman gayud sa mga lagda.

Matud ni LTO-7 operations officer Joel Maloloy-on nga sa miaging tuig wala’y mga aksidente atol sa pag-obserbar sa “kalag-kalag” kay mituman man ang mga bus operators sa mga lagda. Ang LTO mosusi sa Road Worthiness sa mga sakyanan, apil niini ang pagsiguro nga wala magpa-overload og pasahero ang mga bus, ingon man hitsas ang ilang mga mekanismo sa sakyanan.

Susihon usab sa LTO ang sitwasyon sa mga drayber kun wala ba sila kapoya nga magduka unya sa ilang pagmaneho, o kaha wala ba kini makainom og ilimnong makahubog.

Si Emil Membrillas, representante sa Land Transportation Franchising and Regulatory Board (LTFRB) mibutyag nga gamay pa kaayo ang miaplay og special permit aron legal ang ilang pagbiyahe gawas sa ilang mga rota. Ang tigpamaba sa mga bus operators nga si Julieto Flores niawhag sa iyang kaubanan nga susihon gayud kanunay ang kahimtang sa ilang mga sakyanan aron paglikay sa disgrasya.

Samtang gisugdan na ang pagdestino og kapolisan sa lainlaing mga menteryo dinhi sa dakbayan sa Sugbo ug ang lima ka sam-ang gipangbutangan na usab og mga CCTV camera.

Si Chief Inspector David Señor sa Cebu City Police Office miila sa mga sam-ang nga mao ang sa Carreta, Calamba, Queen City Gardens, Cebu Memorial Park ug Pardo Catholic cemetery.

Bisitahan usab kanunay sa mga polis ang mga terminal. Gipahinumdoman sa kapolisan ang katawhan nga dili mokumpiyansa ug dili biyaan ang ilang balay nga wala’y mahabilin nga kauban sa pamilya.

Gipahibalo ni Señor nga red alert ang kapolisan ug wala na’y gitugotan nga maka-leave sa ilang trabaho aron pagsiguro sa kaluwasan sa mga tawo nga mobisita sa sam-ang. Sa north bus terminal, ang terminal supervisor nga si Melecio Lumapas nagtuo nga daghan g’yud nga mga tawo ang modagsa sa terminal gikan karon ug hangtud na sa Domingo sa buntag.

Matud ni Lumapas nga dili mag-ilog ang mga pasahero nga mosakay sa bus kay mohatag sila og priority numbers aron kadtong una nga miabot, una usab nga makasakay.

Did-an usab ang mga drayber nga mopasakay og sobra sa gitugot nga pasahero aron ang sobra nga kabug-at dili maoy makaingon sa aksidente.

Nabantayan hinoon nga ang mga drayber sa bus dili gayud mopasakay og pasahero nga sobra sa gilatid kanila nga gidaghanon, apan adto na sila magpa-overload kun layo na sa terminal.

Si Ramon Dumayac, operations manager sa Cebu South Bus Terminal, miingon nga mi-request na siya og dugang polis nga madestino sa pagbantay sa terminal. (Brenda D. Batuto, Romeo T. Limpangog, Jojo C. Ugdol , Rowena D. Capistrano, Decemay Padilla/RUB)