CEBU, Philippines - Ang Lapu-Lapu City midangop sa Central Command aron magpatabang sa Philippine Air Force aron mopadala og helicopter alang sa pagpangita sa tulo ka bata nga na-missing sa kadagatan sa isla sa Olango sukad pa sa miaging Domingo.
Matud ni Andy Berame, hepe sa Lapu-Lapu City Risk Reduction Management Council, negatibo gihapon ang search operation sa tulo ka bata nga sila si Jose Maria Eduardo Refullino, Aaron Hida, pulos nag edad og 15 anyos ug Shaun Michael Daño, 9 anyos nga mga residente sa barangay Baring sa nahisgutang isla.
Sumala pa ni Berame mas maayong adunay himuong aerial search sa daling panahon tungod kay lapad ang maabot niini itandi sa naandang pagpangita gamit ang mga sakyanan sa dagat.
Si Radaza mimando kang Berame nga makig-alayon gihapon sa mga kapolisan ug coast guard. "I instructed him to make a report to me kay dili nato undangon unless makahibaw ta sa situation sa mga bata," matud ni Radaza. Apan, nadismaya si Radaza nga wala maghimo sa ilang trabaho ang kapolisan nga unta sakop man sila sa Task Force Kalikasan ug kalakip sa ilang trabaho ang safety sa mga residente sa isla.
"They should stay vigilant in times like this because they know the island and they know what is going on around their area," dugang ni Radaza.
Prayoridad karon sa mayor nga makita ang mga bata ug mabalik sa ilang mga pamilya. (BANAT NEWS)