CEBU, Philippines - Usa ang patay ug upat ang naangol sa tulo ka aksidente sa kadalanan diha sa South Road Properties sa dakbayan sa Sugbo ug sa dakbayan sa Toledo.
Patay nang nalandig sa tambalanan si Albert Punay, 29, drayber sa motor, samtang naangol ang drayber sa Starex van nga nakabangga niya nga si Arnold Yap, 44, lakip na sa anak niini nga si Katherine, 12.
Base sa imbestigasyon sa kapolisan padulong ang mga biktima sa dakbayan sa Sugbo samtang ang van gikan sa dakbayan sa Sugbo ug padulong sa dakbayan sa Carcar apan pag-abot sa may SRP Bridge nawad-an og brakes ang van.
Nahadlok ang drayber nga ibangga sa tuo hinungdan nga iyang gidumbol ang van sa center island apan nalahos kini sa pikas lane ug nadumbolan ang motor.
Grabeng kadaot ang naangkon ni Punay samtang ang amahan ug anak nakaangkon og grabeng kadaot sa lawas.
Apan dihang gidala na sa tambalanan si Punay gideklarar siya nga dead on arrival samtang gi-admit sa tambalanan ang drayber sa van nga si Yap.
Wa pay desisyon ang pamilya ni Punay kun ilang pasakaan og kaso ang drayber sa van tungod sa maong disgrasya. Si Punay bag-o lang gyud nagsaulog sa iyang adlaw nga natawhan karon buwana.
Samtang duha ang naangol sa managlahing aksidente sa kadalanan sa managlahing lugar sa dakbayan sa Toledo.
Si Lourdes Gonzaga, 58, taga sitio Tisa sa barangay Sangi naangol human nadasmagan og traysikol nga gimaneho ni Raymund Mahidlawon, 27, samtang kini naglakaw sa barangay Poblacion.
Matud pa padung magpagasolina ang traysikol apan sa pagliko niini napunggit niya ang ginang.
Nakaangkon og samad sa ulo ang biktima ug gidala sa Vicente Sotto Memorial Medical Center.
Samtang naangol ang usa ka grade 4 pupil nga si Mariel Mendez, 9, human kini nadasmagan ni Jonry Rico, 28, nga nagmaneho og motor, paglabang sa bata padung sa iyang eskuylahan diha sa barangay Awihao sa mao gihapong dakbayan.
Ang bata nakaangkon og mga samad ug bun-og sa nagkadaiyang parti sa lawas ug gidala sa Toledo City Hospital. (BANAT NEWS)