VM Labella, DH gi-drug test
CEBU, Philippines – Gipaubos sa surprise drug test ang mga dagku’ng opisyal sa Cebu City Hall kagahapon apil na si Bise Mayor Edgardo Labella.
Matud sa pangulo sa Cebu City Office for Substance Abuse Prevention, Dr. Alice Utlang, nga 38 ka newly hired employees ug laing 29 ka empleyado nga gilangkuban sa department heads, assistant department heads ug ni Labella ang niapil sa drug test.
Gibutyag ni Utlang nga humanon gyud nila pag-drug test ang tanan nga naglakip ni Mayor Michael Rama nga nagpaabot na lang nga maka-ihi aron makaduso sa iya’ng ihi para ma-drug test.
Karong adlawa masayran ang resulta sa drug test.
Samtang gihulagway ni Utlang nga mas daghan ang niangkon nga tiggamitan og ginadili’ng drugas sa kabarangayan itandi sa nilabay nga tuig.
Base sa talaan sa COSAP, 20 na ka empleyado sa barangay ang boluntaryo nga niangkon nga tiggamitan og ginadili’ng drugas nga mas daghan kaysa nilabay nga tuig nga wala nakaabot sa napulo.
Matud ni Utlang nga 15 na ka barangay ang napaubos sa drug test ug 15 na usab ka empleyado ang nagpositibo diin sa kinatibuk-an niabot og 35 kabuok dala na sa mga nangangkon nga tiggamitan og drugas.
Dugang ni Utlang nga kasagaran sa mga nagpositibo mga loader, tanod ug driver.
Drug-free workplace ang barangay Pamutan human wala’y niguwa nga positibo sa drug test nga gipahigayon sa barangay. - /GMR) (BANAT NEWS)
- Latest
