CEBU, Philippines – Mga traffic enforcers mireklamo ngadto sa ilang labaw kabahin sa mga hulga nga ilang nadawat gikan sa mga drayber sa mga pasaheroan dinhi sa dakbayan sa Sugbo.
Kini maoy gitug-an ni Cebu City Transportation Office (CCTO) Executive Director Atty. Rey Gealon human sa estrikto nilang pagpatuman sa mga lagda sa trapiko.
Usa sa mga mireklamong traffic enforcer mao si Perelyn Dosdos kinsa misumbong nga gitudlotudlo siya sa konduktor sa pasaheroan nga dunay rota nga 13C ug gihulga kini nga patyon.
Matud pa gisitar ni Dosdos ang maong pasaheroan tungod kay nagpaugat kini sa eskina dan Pelaez ug P. Del Rosario (duol sa University of San Carlos Main Campus) ug nagsige og panawag og pasahero bisan go signal na. Laing gihulga nga kawani sa CCTO mao si Sandy Ramas, usa ka parking aid nga mibadlong sa usa ka taxi nga ilegal nga niparada sa iyang sakyanan diha sa Fuente Osmeña Rotunda.
Si Gealon miingon nga dili siya makatugot nga hulga-hulgaon ang mga traffic enforcers tungod kay naghimo lang sila sa ilang trabaho.
Ang duha ka insidente gipadangat na nila sa kapolisan alang sa imbestigasyon tungod kay plano sa CCTO nga pasakaan og kasong kriminal kadtong mga nanghulga sa mga traffic enforcers. - /EIM) (BANAT NEWS)